Heb 12 | HMO | STEP | Bona ita be edena bamona? Ita idia itaia noho taudia momo herea ese ita idia hagegea noho. Abidadama dalana ita dekenai idia ese idia hedinaraia vadaeni. Unai dainai, namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu, be mai haheauka danu do ita heau goada.

Hebrews 12

Iseda matana do ita negea Iesu dekenai

1 Bona ita be edena bamona? Ita idia itaia noho taudia momo herea ese ita idia hagegea noho. Abidadama dalana ita dekenai idia ese idia hedinaraia vadaeni. Unai dainai, namona be ita idia hametaua gaudia ibounai, bona ita idia guia noho kara dikadia do ita negea momokani. Vadaeni iseda vairana dekenai ia noho heau helulu, be mai haheauka danu do ita heau goada. 2 Iseda matana be Iesu dekenai do ita negea lao. Ia ese iseda abidadama ia havaraia, bona ia ese iseda abidadama do ia durua, ela bona dokona. Iesu be satauro dainai ia hesiku lasi. Lasi momokani. Ia diba guba ena moale be iena vairanai ia noho dainai, ia ese satauro ena hemarai bona ena mase ia laloa lasi. Bona hari ia be Dirava ena helai gabuna badana ena idiba kahanai ia helai noho.

Dirava ese ita ia matakani henia, dala do ita raka maoromaoro totona

3 Iesu ena hisihisi do umui laloa namonamo: Kara dika taudia ese mai badu danu ia idia dagedage henia. To ia goada noho. Unai dainai do umui hesiku lasi, bona do umui manoka lasi. 4 Umui ese kara dika umui koua toho noho, umui tuari henia bamona, mai emui goada danu. To emui tuari lalonai, emui rarana be ia do bubua lasi, ani? 5 Buka Helaga lalonai Dirava ese sisiba hereva namona ia gwauraia, umui do ia hagoadaia totona. Umui laloaboio, a? Tamana ta ese iena natuna ia sisiba henia bamona, Dirava ese umui do ia sisiba henia, ia gwau:

“Lauegu natuna e,
Lohiabada ena matakani do oi negea lasi,
Ia ese oi ia sisiba henia neganai, do oi manoka lasi.
6 Badina be Lohiabada ese ia ura henia tauna ia matakani henia.
Bona bema tau ta be,
Dirava ese iena natuna ia gwauraia neganai,
Dirava ese unai tau do ia dadabaia.”
7 Unai dainai, namona be hisihisi umui davaria neganai, mai heheauka danu do umui abia dae, emui tamana ese umui ia matakani henia bamona. Badina inai be toana namona, ia hedinaraia momokani umui be Dirava ena natuna, bona ia ese umui dekenai ia kara henia, iena natuna korikori dekenai ia kara henia hegeregerena. Badina be edena mero be iena tamana ese ia matakani henia lasi? 8 Io, tamana ibounai ese edia natuna idia matakani henidia. Bema Tamana Dirava ese oi ia matakani henia lasi neganai, inai anina be, oi be iena natuna korikori lasi, oi be ariara merona sibona. 9 Bona inai danu, iseda tamana inai tanobada dekenai ese ita idia matakani henia, ani? To ita ese idia ita matauraia, ani? Vadaeni, namona be iseda lauma ena Tamana do ita matauraia, bona mauri do ita davaria. 10 Iseda tamana inai tanobada dekenai ese ita idia matakani henia, edia ura hegeregerena. To Dirava ese ita ia matakani henia, be ita durua bona hanamoa totona, bona ia danu do ita helaga hebou totona. 11 Tamana ese metau bona hisihisi ita dekenai ia henia neganai, iseda lalona idia hisihisi, bona ita be moale lasi. To gabeai, inai matakani ese idia ia hamaoromaoroa vadaeni taudia ese, kara maoromaoro ena davana namona, mai maino danu do idia davaria.

Umui emui lalona do umui ha-aukaia, bona do umui gini goada

12 Vadaeni, umui emui imana idia manoka neganai, do umui abia isi, do umui ha-aukaia. Bema emui tuina idia heudeheude neganai, do umui gini goada noho. 13 Bona emui aena idia raka dala do umui hamaoromaoroa. Unai dekena amo, emui aena dika taudia ese edia bero do idia habadaia lasi, to do idia namo lou lao.

14 Mai maino danu taunimanima ibounai danu do umui noho, bona Dirava ena kara helagadia danu do umui karaia. Badina be kara helaga lasi tauna ese Lohiabada do ia itaia lasi. 15 Umui naria namonamo, umui ta ese Dirava ena hariharibada do ia reaia garina. Umui ta be au dikana bamona do umui tubu lasi. Badina be ia tubu neganai, iena poisini ese hisihisi bona kerere momo umui emui huanai do ia havaraia garina. 16 Bona do umui naria namonamo, umui ta ese heudahanai o sihari kava karadia do ia karaia garina. O umui ta ese Dirava ia laloa lasi garina, Esau ia karaia bamona. Ia be lauma lasi tauna dainai, iena vara guna ahuna ia negea, aniani tamona do ia hoia totona. 17 Umui diba, Esau be gabeai ia ura iena tamana ena hanamoa do ia abia, to Dirava ese iena noinoi ia abia dae lasi. Io, mai tai momo danu, Esau ese lalona giroa dalana ia tahua, to ia davaria lasi.

Ita be Siona Ororo dekenai ita gini noho vadaeni

18 Umui gini noho gabuna mani umui laloa. Israela taudia be Sinai Ororo kahirakahira idia gini bamona umui gini lasi. Umui gini noho gabuna, be emui imana ese idia dogoatao diba lasi, to Israela taudia be unai ororo kahirakahira dainai, idia ese idia dogoatao diba. Umui be lahi siahu badana ena vairanai umui gini lasi. Dibura masemase, korema dikadika gauna, bona guba dika herea ese umui idia hagaria lasi, Israela taudia idia hagaria bamona. 19 Kibi ena regena bada, bona gado ta idia kamonai, mai gari bada. Unai gado idia kamonaia neganai, idia ese Mose idia tai henia, idia noia, idia gwau, “Mani emu kara, ai ura lasi unai hereva ma ai kamonai.” 20 Badina be Dirava ena hereva dekenai idia gari dikadika. Dirava ia gwau, “Bema tau ta ese iena imana dekenai unai ororo ia dogoatao neganai, unai tau do umui hodoa mase. Bona boromakau o mamoe, idia danu bema ororo idia kamokau, do umui hodoa mase.” 21 Israela taudia ibounai ese idia itaia gaudia dekenai idia gari bada herea. Mose danu ia hereva, ia gwau, “Lau gari momo, bona lau heudeheude dikadika noho danu.”

22 Unai bamona gari gaudia be umui dekenai idia ginidae lasi, ani? To umui be Siona Ororo kahirakahira umui ginidae vadaeni. Inai be Dirava ena hanua badana, mauri gabuna. Inai gabu ena ladana be Ierusalema, guba dekenai. Inai gabu lalonai, aneru momo herea momokani idia noho hebou. 23 Dirava ena vara guna natuna taudia edia hebou gabuna dekenai umui ginidae vadaeni. Unai natuna taudia edia ladana be guba dekenai idia torea vadaeni. Umui be Dirava dekenai umui ginidae vadaeni. Ia be taunimanima ibounai edia Kota Biaguna Badana. Dirava ese ia gwauraidia maoromaoro taudia ibounai edia lauma danu be unai gabu dekenai idia noho, mai edia goevagoeva danu. 24 Bona Iesu dekenai umui ginidae vadaeni. Ia be Dirava ena taravatu matamata ia havaraia Tauna, ia danu be unuseni ia noho. Bona Iesu ena rarana dekenai danu umui ginidae vadaeni. Unai rara be mai ena gwauhamata hereva namona ita dekenai. Oibe, Iesu ena rara sivaraina, ese Abela ena rara herevana ia hereaia momokani.

Umui naria namonamo

25 Umui naria namonamo, umui dekenai ia hereva noho Diravana ena hereva do umui negea garina. Gunaguna Dirava ese Israela taudia dekenai ia hereva goada, vadaeni iena hereva idia kamonai henia lasi. Unai neganai idia be dala lasi edia kara dika davana dekena amo idia heau mauri diba. Harihari Dirava be guba dekena amo ita dekenai ia hereva goada noho. Bema iena hereva ita negea, edena bamona iseda dika davana dekena amo do ita heau mauri diba, a? Lasi momokani. 26 Gunaguna neganai, Dirava ena gadona ese tanobada ia hamarerea. To harihari Dirava ese ita ia gwauhamata henia, ia gwau, “Nega tamona ma, lau ese tanobada do lau hamarerea, bona tanobada sibona lasi, to guba danu do lau hamarerea.” 27 Unai hereva “nega tamona ma” ena anina be, gunaguna Dirava ese ia karaia gaudia, be ia ese do ia hamarerea, vadaeni idia be do ia kokia haorea. Bona ia hamarerea diba lasi gaudia be do idia noho.

28 Inai ita abia vadaeni Basileia, be tau ta ese do ia hamarerea diba lasi gauna. Unai dainai Dirava ita tanikiu henia be namo. Bona namona be Dirava do ita tomadiho henia, mai hemataurai bona mai gari danu. Namona be iena gaukara do ita karaia, iena ura dala hegeregerena. 29 Badina iseda Dirava be lahi badana momokani bamona. Ia ese gau ibounai ia araia haorea noho.